पोल्यान्ड सीमानजिक यात्रुवाहक रेलमा रुसी ड्रोन आक्रमण, युरोपमा बढ्यो सुरक्षा चिन्ता 

किभ — रुसको ड्रोनले युक्रेनको भोलिन क्षेत्रमा किभबाट वार्सा जाँदै गरेको यात्रुवाहक रेलको इन्जिन (locomotive) मा आक्रमण गरेको छ। घटना पोल्यान्डको सीमाबाट करिब २ किलोमिटर टाढा भएको थियो। रेलमा २०६ यात्रु रहेको बताइएको छ र समयमै खतरा पहिचान गरी सुरक्षा उपाय अपनाइएकाले कुनै मानवीय क्षति भएको छैन।

घटनालाई अझ संवेदनशील बनाउने विषय भनेको आक्रमण हुनुभन्दा केही समयअघि यही क्षेत्र हुँदै पूर्व बेलायती प्रधानमन्त्री बोरिस जोनसन, पूर्व स्विडिस प्रधानमन्त्री कार्ल बिल्ट तथा युरोपेली सुरक्षा अधिकारीहरू सवार कूटनीतिक रेल गुज्रिएको थियो। युक्रेनी रेल सेवाले उक्त कूटनीतिक रेल नै निशाना हुन सक्ने सम्भावना रहेको बताए पनि यो कुरा स्वतन्त्र रूपमा पुष्टि भएको छैन।

त्यही क्षेत्रमा अर्को रुसी ड्रोनले सीमा नाका नजिकको ग्यास स्टेसन/सवारी क्षेत्रमा समेत प्रहार गरेको थियो, जसका कारण Yahodyn–Dorohusk सीमा नाका केही समय बन्द गरिएको थियो। रुसको रक्षा मन्त्रालयले पश्चिमी युक्रेनमा युरोपबाट सैन्य सामग्री ओसार्न प्रयोग हुने रेल पूर्वाधारलाई निशाना बनाएको बताएको छ।