साउदी अरबमाथि हुथी आक्रमण, तेल आपूर्तिमा विश्वव्यापी चिन्ता 

रियाद — यमनका इरान समर्थित हुथी विद्रोहीले साउदी अरबको दक्षिणी क्षेत्रस्थित King Khalid Air Base लाई लक्षित गर्दै दर्जनौँ मिसाइल र ड्रोन प्रहार गरेको दाबी गरेका छन्। हुथीका अनुसार विमान ह्याङ्गर, राडार, रनवे र हतियार भण्डारण क्षेत्र निशानामा थिए। आक्रमणपछि साउदीका केही दक्षिणी सहरमा आपतकालीन चेतावनी जारी गरिएको थियो। साउदी पक्षले भने हुथीको उक्त दाबीको विस्तृत पुष्टि गरेको छैन।

यसैबीच साउदी अरबको अत्यन्त महत्वपूर्ण East-West oil pipeline मा भएको छुट्टै ड्रोन आक्रमणले ऊर्जा बजारमा थप दबाब सिर्जना गरेको छ। महत्वपूर्ण कुरा के हो भने साउदी अधिकारीहरूले यो पाइपलाइन आक्रमण हुथीले गरेको नभई इराकबाट आएका इरान समर्थित समूहसँग जोडिएको बताएका छन्। पाइपलाइनको क्षति मर्मत गर्न करिब ३ देखि ५ हप्ता लाग्न सक्ने अधिकारीहरूको अनुमान छ।

यो करिब १,२०० किलोमिटर लामो East-West Pipeline साउदीको पूर्वी तेल क्षेत्रबाट कच्चा तेललाई लालसागरको यान्बु बन्दरगाहसम्म पुर्‍याउने प्रमुख मार्ग हो। पछिल्लो समय यसबाट दैनिक औसत करिब २.६ देखि ४ मिलियन ब्यारेल तेल प्रवाह भइरहेको विश्लेषण छ। पाइपलाइन लामो समय पूर्ण रूपमा बन्द रहे विश्व बजारको तेल आपूर्तिमा उल्लेख्य असर पर्न सक्ने चिन्ता बढेको छ।

तनावसँगै अन्तर्राष्ट्रिय बजारमा तेलको मूल्य पनि बढेको छ। सोमबार कारोबारका क्रममा Brent crude करिब $106 प्रति ब्यारेल आसपास पुगेको थियो। हुथीले लालसागरका रणनीतिक क्षेत्र तथा टापुमा प्रभाव विस्तार गरिरहेकाले Bab el-Mandeb हुँदै हुने तेल तथा व्यापारिक ढुवानीमा समेत जोखिम बढेको छ।