सल्यानमा स्क्रब टाइफस संक्रमण तीव्र, परीक्षण गरिएका झन्डै एकतिहाइमा संक्रमण
सल्यानको दार्मा गाउँपालिकामा स्क्रब टाइफस संक्रमण तीव्र बनेको छ। सोमबार एकै दिन १९१ जनाको परीक्षण गर्दा ६० जनामा संक्रमण पुष्टि भएको स्थानीय स्वास्थ्य शाखाले जनाएको छ। पछिल्लो एक महिनामा संक्रमणबाट सात जनाको मृत्यु भएको छ भने विभिन्न बस्तीमा दैनिक दुईदेखि पाँच नयाँ संक्रमित भेटिइरहेका छन्।
संक्रमण बढेपछि जिल्ला अस्पताल सल्यानबाट चिकित्सकसहितको टोली औषधि र परीक्षण सामग्री लिएर प्रभावित क्षेत्रमा पुगेको छ। सबैभन्दा बढी प्रभावित दार्मा–१ बाट परीक्षण सुरु गरिएको छ भने गाउँपालिकाले चार स्थानबाट परीक्षण सेवा विस्तार गरेको छ।
पछिल्लो दुई महिनामा दार्मा र बागचौरमा ३३५ जनाको परीक्षण गर्दा ११६ जनामा संक्रमण पुष्टि भएको छ। संक्रमण कुमाखलगायत अन्य स्थानीय तहमा पनि देखिएको स्वास्थ्य अधिकारीहरूले बताएका छन्।
परीक्षण किटको मौज्दात कम हुँदै गएपछि दार्मा गाउँपालिकाले थप १,००० देखि १,२०० किट आवश्यक रहेको भन्दै प्रदेश र संघीय सरकारसँग सहयोग मागेको छ। स्वास्थ्यकर्मीहरूले ज्वरो आएमा आफैं औषधि सेवन नगरी तत्काल स्वास्थ्य संस्थामा पुगेर परीक्षण गराउन आग्रह गरेका छन्।