त्रिपुरेश्वरमा बसभित्र चालकद्वारा आत्मदाहको प्रयास, अवस्था गम्भीर 

काठमाडौं : काठमाडौंको त्रिपुरेश्वरमा सोमबार सार्वजनिक बसका चालकले यात्रुहरूलाई ओरालेपछि बसभित्र आगो लगाएको प्रहरीको प्रारम्भिक अनुसन्धानले देखाएको छ। घटनामा चालक दावा लामा गम्भीर घाइते भएका छन्।

प्रहरीका अनुसार आगलागी हुँदा चालक बसभित्रै थिए। प्रहरी घटनास्थल पुग्दा बसको ढोका भित्रबाट बन्द अवस्थामा रहेको र ढोका फुटाएर चालकको उद्धार गरिएको थियो। त्यसपछि उनलाई उपचारका लागि कीर्तिपुरस्थित बर्न अस्पताल लगिएको छ।

अस्पतालका चिकित्सकका अनुसार लामाको शरीरको ९० प्रतिशतभन्दा बढी भाग जलेको छ र उनको अवस्था निकै गम्भीर छ। आगलागीबाट अन्य यात्रु घाइते भएको विवरण अहिलेसम्म आएको छैन।

घटनाअघि चालक र ट्राफिक प्रहरीबीच विवाद भएको देखिने भिडियो सामाजिक सञ्जालमा सार्वजनिक भएको छ। केही सञ्चारमाध्यमले चालकले आफूमाथि दुर्व्यवहार भएको गुनासो गरेको उल्लेख गरेका छन्। तर त्यही विवादका कारण उनले आगो लगाएको हो भन्ने कुरा प्रहरीले अहिलेसम्म पुष्टि गरेको छैन।

घटनाको वास्तविक कारण पत्ता लगाउन काठमाडौं उपत्यका प्रहरी कार्यालयले एसएसपी रमेश बस्नेतको नेतृत्वमा छानबिन समिति गठन गरेको छ। समितिलाई पाँच दिनभित्र छानबिन गर्न समय दिइएको छ।

प्रहरीले यात्रु, प्रत्यक्षदर्शी तथा घटनासँग सम्बन्धित व्यक्तिहरूसँग सोधपुछ गरिरहेको छ। आगो कसरी लगाइयो र घटनाको वास्तविक कारण के थियो भन्ने विषय अनुसन्धानपछि मात्र स्पष्ट हुने प्रहरीले जनाएको छ।