संकटको घडीमा राष्ट्रपतिको सम्बोधन: एकता र धैर्यका लागि देशवासीलाई आह्वान
काठमाडौं — भोटेकोशीको विनाशकारी बाढीपछि राष्ट्रपति रामचन्द्र पौडेलले राष्ट्रका नाममा सम्बोधन गर्दै विपत्तिको सामना गर्न सम्पूर्ण देशलाई एकताबद्ध हुन आह्वान गरेका छन्।
राष्ट्रपतिले मृतकप्रति श्रद्धाञ्जली र परिवारजनमा समवेदना व्यक्त गर्दै बेपत्ताको खोज तथा उद्धार कठिन परिस्थितिका कारण रोकिन नहुने स्पष्ट पारे। पीडितलाई खाद्यान्न, स्वच्छ पानी, सुरक्षित आश्रय, उपचार तथा मनोसामाजिक सेवा सुनिश्चित गर्नुपर्नेमा पनि उनले जोड दिए।
उनले विदेशी नागरिकका परिवारप्रति समेत समवेदना व्यक्त गर्दै अन्तर्राष्ट्रिय समुदायलाई नेपालको हिमाली क्षेत्रमा बढ्दो जलवायु जोखिमलाई गम्भीरतापूर्वक लिन र जलवायु न्यायका लागि ठोस कदम चाल्न आह्वान गरे।
राष्ट्रपतिले अबको प्राथमिकता खोज तथा उद्धार, पीडितको पुनःस्थापना, पुनर्निर्माण र आर्थिक पुनरुत्थान हुनुपर्ने उल्लेख गर्दै भविष्यका विपद् सामना गर्न नेपालको विकास मोडेलमाथि समेत पुनर्विचार गर्नुपर्ने संकेत गरेका छन्।