लेबनानको सुरक्षा मजबुत बनाउन फ्रान्स र जोर्डनको पहल
पेरिस : लेबनानको सुरक्षा अवस्था र दक्षिणी क्षेत्रमा भविष्यमा अपनाइने सुरक्षा व्यवस्थाबारे फ्रान्सको राजधानी पेरिसमा उच्चस्तरीय वार्ता भएको छ। फ्रान्सेली राष्ट्रपति इमानुएल म्याक्रों, लेबनानी राष्ट्रपति जोसेफ आउन र जोर्डनका राजा अब्दुल्लाह द्वितीय वार्तामा सहभागी भएका छन्।
वार्तामा विशेषगरी लेबनानी सेनाको क्षमता अभिवृद्धि, दक्षिणी लेबनानको सुरक्षा तथा संयुक्त राष्ट्रसंघीय शान्ति मिसन UNIFIL को म्याद सकिएपछिको सम्भावित सुरक्षा व्यवस्थाबारे छलफल भएको छ। सैन्य विज्ञहरूको उच्चस्तरीय बैठकमा लेबनानी सेनाको आवश्यकता पहिचान गरी अन्तर्राष्ट्रिय सहयोग जुटाउने विषयमा पनि जोड दिइएको छ।
UNIFIL को वर्तमान व्यवस्था वर्षको अन्त्यतिर सकिने तय भएकाले त्यसपछि दक्षिणी लेबनानमा सुरक्षा खालीपन हुन नदिन वैकल्पिक अन्तर्राष्ट्रिय उपस्थितिबारे छलफल भइरहेको छ। फ्रान्स र लेबनानले भने UNIFIL को अवधि सीमित समयका लागि थप गर्नुपर्ने पक्षमा पहल गरिरहेका छन्।
फ्रान्स र जोर्डनले लेबनानको सार्वभौमिकता तथा सम्पूर्ण भूभागमा राज्यको सुरक्षा नियन्त्रण सुदृढ गर्न सहयोग गर्ने प्रतिबद्धता पनि दोहोर्याएका छन्।
