बाढीपहिरोपछि खुल्न थाले मुख्य राजमार्ग, देशभर आवागमन सहज बन्दै
काठमाडौं : लगातारको वर्षापछि आएको बाढीपहिरोका कारण अवरुद्ध भएका देशका विभिन्न प्रमुख राजमार्ग क्रमशः सञ्चालनमा आउन थालेका छन्। सडक मर्मत र वैकल्पिक ट्र्याक निर्माणसँगै पृथ्वी तथा बीपी राजमार्गका प्रभावित खण्डमा सवारी आवागमन सहज बन्दै गएको छ।
पृथ्वी राजमार्गको कृष्णभीर क्षेत्रमा त्रिशूली नदीको कटानले सडकमा क्षति पुर्याएपछि माथिल्लो भागबाट नयाँ ट्र्याक निर्माण गरी यातायात सञ्चालन गरिएको छ। नागढुंगा–मुग्लिङ सडकका अधिकांश स्थानमा दुईतर्फी सवारी चल्न थाले पनि केही क्षेत्र अझै पहिरोको जोखिममा रहेको बताइएको छ।
बीपी राजमार्गमा पनि बाढीले क्षति पुर्याएका सडक तथा अस्थायी डाइभर्सन मर्मत गरेर यातायात सञ्चालनमा ल्याइएको छ। कान्ति राजमार्गमा समेत आवागमन सामान्य बन्दै गएको छ।
तर बाढीपहिरो प्रभावित सबै सडक पूर्ण रूपमा सञ्चालनमा आएका छैनन्। लमजुङ–मनाङ र म्याग्दी–मुस्ताङ सडकका विभिन्न खण्ड अझै प्रभावित छन्। बेनी–जोमसोम सडकमा दुवैतर्फबाट मर्मतको काम भइरहेको छ।
सडक विभाग तथा सम्बन्धित आयोजनाहरूले अवरुद्ध सडक खुलाउने, पहिरो हटाउने र क्षतिग्रस्त संरचना मर्मत गर्ने काम जारी राखेका छन्। थप वर्षा नभए बाँकी प्रभावित सडकमा पनि क्रमशः यातायात सहज हुने अपेक्षा गरिएको छ
तस्बिर: Saddam Hussain Ansari / Wikimedia Commons / CC BY 4.0
