भारतसहित २० क्षेत्रबाट आउने विशेष औषधिमा अमेरिकाले शून्य भन्सार सुविधा

 वासिङ्टन : अमेरिकाले भारतसहित २० देश तथा क्षेत्रबाट आयात हुने निश्चित विशेष प्रकारका औषधि र तिनका सामग्रीमा शून्य प्रतिशत भन्सार दर लागू गर्ने भएको छ। अमेरिकी वाणिज्य मन्त्रालयले सार्वजनिक गरेको सूचनामा  भारतलाई यो सुविधा पाउने सूचीमा राखिएको छ।

नयाँ व्यवस्थाअन्तर्गत दुर्लभ रोगको उपचारमा प्रयोग हुने निश्चित औषधि, न्यूक्लियर मेडिसिन, प्लाज्माबाट तयार गरिने उपचार, प्रजननसम्बन्धी औषधि, सेल तथा जीन थेरापी र केही विशेष औषधिजन्य सामग्रीले भन्सार छुट पाउनेछन्।

अमेरिकाले निश्चित पेटेन्टयुक्त औषधि तथा तिनका सामग्रीमा अतिरिक्त भन्सार लागू गर्ने नीति अघि बढाइरहेका बेला विशेष श्रेणीका औषधिलाई छुट दिने व्यवस्था गरिएको हो।

यद्यपि यो छुट भारतबाट अमेरिका निर्यात हुने सबै औषधिमा लागू हुने छैन। विशेष मापदण्डमा पर्ने औषधि तथा सामग्रीले मात्र शून्य भन्सार सुविधा पाउनेछन्। भारतसँगै बेलायत, जापान, दक्षिण कोरिया, बंगलादेश, थाइल्यान्ड, भियतनाम तथा युरोपेली संघलगायतका क्षेत्र पनि यो व्यवस्थामा समेटिएका छन्।

Photographer: Beendy234.