इरानमाथिको सैन्य कारबाहीमा अंकुश लगाउन अमेरिकी प्रतिनिधिसभाको कदम 

वासिङ्टन : इरानमा जारी अमेरिकी सैन्य कारबाहीमाथि अंकुश लगाउने उद्देश्यले अमेरिकी प्रतिनिधिसभाले ‘वार पावर्स’ प्रस्ताव पारित गरेको छ। मंगलबार भएको मतदानमा प्रस्तावको पक्षमा २२० र विपक्षमा २०४ मत परेको हो। सबै डेमोक्र्याटसँगै सात रिपब्लिकन सांसदले पनि प्रस्तावको समर्थन गरेका छन्।

प्रस्तावले कंग्रेसको स्वीकृतिबिना राष्ट्रपति डोनाल्ड ट्रम्पले इरानमा सैन्य कारबाही जारी राख्ने अधिकार रोक्न खोजेको छ। इरान युद्ध अन्त्य गर्ने उद्देश्यले अमेरिकी प्रतिनिधिसभाले यस्तो प्रस्ताव पारित गरेको यो तेस्रो पटक हो।

तर प्रस्ताव पारित हुँदैमा अमेरिकी सैन्य कारबाही तत्काल रोकिने छैन। यसअघिका समान प्रस्ताव राष्ट्रपतिको डेस्कसम्म पुगेका छैनन् र पछिल्लो प्रस्तावले पनि थप विधायी प्रक्रिया पार गर्नुपर्नेछ।