अमेरिका–चीनबीच व्यापारमा नयाँ सहमति, करिब ६० अर्ब डलरका वस्तुमा भन्सार घटाउने तयारी 

वासिङ्टन/बेइजिङ — अमेरिका र चीनले आपसी व्यापार तनाव कम गर्ने प्रयासअन्तर्गत दुवैतर्फ करिब ३०–३० अर्ब डलर, अर्थात् कुल ६० अर्ब डलर बराबरका गैर-संवेदनशील वस्तुमा भन्सार घटाउने सूची सार्वजनिक गरेका छन्। यो सहमति हालै अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङबीच भएको भेटपछि अघि बढेको हो। 

अमेरिकाले चीनबाट आयात हुने खेलौना, साना घरायसी उपकरण र अन्य उपभोग्य वस्तुमा सहुलियत दिने तयारी गरेको छ। चीनले अमेरिकी कृषि उत्पादन, काठजन्य वस्तु, कस्मेटिक्स र मेडिकल उपकरणलगायतका वस्तुमा भन्सार घटाउने योजना अघि सारेको छ।

चीनको वाणिज्य मन्त्रालयका अनुसार सहमतिमा समेटिएका करिब ९० प्रतिशत वस्तुको भन्सार ‘Most-Favored-Nation’ दरसम्म घटाइनेछ। नयाँ व्यवस्था भने दुवै देशले आवश्यक घरेलु कानुनी प्रक्रिया पूरा गरेपछि एकै समयमा लागू हुनेछ। 

विश्वका दुई ठूला अर्थतन्त्रबीच लामो समयदेखि जारी व्यापार तनावका बीच आएको यो कदमले द्विपक्षीय व्यापार बढाउन र केही वस्तुको आयात लागत कम गर्न सहयोग पुग्ने अपेक्षा गरिएको छ। यद्यपि प्रविधि, महत्वपूर्ण खनिज र अन्य रणनीतिक व्यापारिक विषयमा दुई देशबीच मतभेद अझै कायम छन्।