संयुक्त राष्ट्रसङ्घको ८१ औँ महासभामा सहभागी हुन प्रधानमन्त्री बालेन्द्र शाह प्रस्थान; होटल परिसर र राष्ट्रसङ्घ मुख्यालय अगाडि प्रवासी नेपालीद्वारा प्रदर्शन

न्यूयोर्क — संयुक्त राष्ट्रसङ्घको ८१ औँ महासभा (UNGA) लाई सम्बोधन गर्नका लागि नेपालका प्रधानमन्त्री बालेन्द्र शाह न्यूयोर्कस्थित आफ्नो आवासस्थल (होटल हायात ग्रान्ड सेन्ट्रल) बाट राष्ट्रसङ्घ मुख्यालयतर्फ प्रस्थान गर्नुभएको छ।
प्रधानमन्त्री शाह होटलबाट बाहिरिने क्रममा त्यहाँ उपस्थित न्यूयोर्कका प्रवासी नेपाली समुदाय तथा समर्थकहरूले उहाँको भव्य स्वागत र अभिवादन गरेका थिए। सोही अवसरमा होटल परिसर बाहिर भेला भएका नेपालीहरूले राष्ट्रिय झण्डा र प्लेकार्डसहित नेपालमा परेको जलवायु परिवर्तनको असर र जलवायु न्यायको पक्षमा ऐक्यबद्धता जनाएका थिए।
यसैगरी, राष्ट्रसङ्घ मुख्यालय बाहिर रहेको ‘ड्याग ह्यामरसोल्ड प्लाजा’ मा ‘भिजिट नेपाल’ सहित विभिन्न नेपाली प्रवासी सङ्घ-संस्था र युवाहरूको संयुक्त आयोजनामा अर्को सशक्त मौन प्रदर्शन, दीप प्रज्वलन तथा प्लेकार्ड प्रदर्शन सम्पन्न भएको छ।
नेपाली राष्ट्रिय झण्डाका साथै “साना उत्सर्जक, ठूलो असर” (Small Emitters, Big Impacts), “हाम्रा हिमालले हिउँ गुमाउँदैछन्” (Our Mountains Are Losing Their Ice), र “जलवायु संकटले मानिसहरूलाई विस्थापित गर्छ, समाधानले घर फर्काउँछ” (Climate Crisis Displaces People, Solutions Bring Them Home) लेखिएका विचारोत्तेजक प्लेकार्ड बोकेका प्रदर्शनकारीहरूले पर्यटनलाई जलवायु विपद्पछिको पुनरुत्थानको मुख्य साँचोका रूपमा विश्वसामु प्रस्तुत गरे।
विश्वव्यापी हरितगृह ग्यास उत्सर्जनमा नगण्य योगदान भए तापनि नेपालले भोग्नुपरेको गम्भीर जलवायु विपद्को क्षतिपूर्ति पाउनुपर्ने र ‘हानि तथा नोक्सानी कोष’ (Loss and Damage Fund) मा नेपालको न्यायोचित पहुँच हुनुपर्ने माग गर्दै प्रदर्शनकारीहरूले सरकारको कदममा पूर्ण समर्थन जनाएका छन्। साथै, जिम्मेवार पर्यटनमार्फत स्थानीय अर्थतन्त्र सुदृढ बनाउने सन्देश प्रवाह गर्दै हिमालय क्षेत्रका बाढी-पहिरो पीडितहरूप्रति समर्पित गरी दीप प्रज्वलन र मौन प्रार्थना समेत गरिएको थियो।