हिमाल जोगाउन ४,९०० मिटर उचाइमा आमरण अनशन, मनास्लुमा ११ युवाको संघर्ष
गोरखा : जलवायु परिवर्तनको बढ्दो जोखिम र हिमताल विस्फोटको सम्भावनाप्रति सरकारको ध्यानाकर्षण गराउन मनास्लु क्षेत्रमा ११ युवाले करिब ४ हजार ९ सय मिटर उचाइमा आमरण अनशन सुरु गरेका छन्।
चुमनुव्री–१ सामागाउँका धावा नोर्वु लामाको नेतृत्वमा शुक्रबारदेखि सुरु भएको अनशनमा युवाहरूले जलवायु जोखिम न्यूनीकरण र हिमताल संरक्षणसम्बन्धी आठबुँदे माग अघि सारेका छन्।
उनीहरूले मनास्लु र चुम उपत्यकाका हिमतालको हवाई अनुगमन, तालको गहिराइ तथा पानीको सतह मापन, सम्भावित हिमताल विस्फोटको जोखिम अध्ययन र जोखिमयुक्त क्षेत्रमा पूर्वसूचना दिने साइरन जडान गर्न माग गरेका छन्।
सीमापारि चीनको तिब्बत क्षेत्रमा रहेका हिमतालको नेपाल र चीनले संयुक्त अनुगमन गर्नुपर्ने मागसमेत उनीहरूको छ। साथै देशभरका हिमतालको नियमित निगरानी र हिमाली क्षेत्रका विद्यालयको पाठ्यक्रममा जलवायु परिवर्तनको असरसम्बन्धी विषय समावेश गर्नुपर्ने उनीहरूले बताएका छन्।
युवाहरूले आफ्ना माग पूरा नभएसम्म आमरण अनशन जारी राख्ने बताएका छन्।
