कांग्रेसमा महाधिवेशन विवाद चर्कियो, दुई पक्ष आ–आफ्नै कार्यतालिकामा
काठमाडौं — नेपाली कांग्रेसभित्र १५औँ महाधिवेशनलाई लिएर संस्थापन र इतर पक्षबीचको विवाद थप चर्किएको छ। सभापति गगन थापा नेतृत्वको पक्षले असोज ३ बाट वडा अधिवेशन सुरु गरी असोज १६–१९ मा केन्द्रीय महाधिवेशन गर्ने प्रक्रिया अघि बढाएको छ। अर्कोतर्फ देउवा पक्षले असोज १५ बाट वडा अधिवेशन र असोज २१–२३ मा केन्द्रीय अधिवेशन गर्ने छुट्टै तालिका अघि सारेको छ।
यसैबीच संस्थापन पक्षले पूर्वसभापति शेरबहादुर देउवा नेतृत्वको पुरानो कार्यसमितिका नेताहरूलाई वर्तमान केन्द्रीय समितिमा समायोजन गर्ने निर्णय गरेपछि देउवा पक्षका करिब ३१ नेता गगन थापा नेतृत्वको कार्यसमितिमा समाहित हुने तयारीमा छन्। यसले समानान्तर महाधिवेशनको तयारी गरिरहेको देउवा पक्षभित्रै नयाँ विभाजन देखिएको छ।
तर डा. शशांक कोइरालाले संस्थापन पक्षको निर्णय स्वीकार्य नभएको बताएका छन्। पार्टीको आधिकारिकतासम्बन्धी मुद्दा सर्वोच्च अदालतमा विचाराधीन रहेकाले महाधिवेशनको एकतर्फी कार्यतालिका स्थगित गरी वार्ता र सहमतिबाट समाधान खोज्नुपर्ने उनको भनाइ छ। उनले विवाद पद बाँडफाँडको मात्र नभई पार्टीको वैधानिकता, एकता र भविष्यसँग जोडिएको बताएका छन्।