२०२७ क्रिकेट विश्वकपमा भारत–पाकिस्तान एउटै समूहमा 

दुबई : अन्तर्राष्ट्रिय क्रिकेट परिषद् (ICC) ले २०२७ पुरुष एकदिवसीय क्रिकेट विश्वकपको खेलतालिका सार्वजनिक गरेको छ। चिरप्रतिद्वन्द्वी भारत र पाकिस्तानलाई एउटै समूहमा राखिएको छ भने दुई टोलीबीचको बहुप्रतीक्षित खेल अक्टोबर १०, २०२७ मा दक्षिण अफ्रिकाको जोहानेसबर्गस्थित वान्डरर्स स्टेडियममा हुनेछ। 

भारत र पाकिस्तान समूह ‘ए’ मा छन्। यो समूहमा साविक विजेता अस्ट्रेलिया, अफगानिस्तान, सहआयोजक जिम्बाब्वे र क्वालिफायर ‘ए’ बाट आउने टोली पनि रहनेछन्। समूह ‘बी’ मा न्युजिल्यान्ड, दक्षिण अफ्रिका, श्रीलंका, इंग्ल्यान्ड, बंगलादेश र क्वालिफायर ‘बी’ रहनेछन्।

विश्वकपको सुरुवात अक्टोबर २ मा नामिबियामा हुने तीन टोलीको ‘सुपर सिरिज’बाट हुनेछ। मुख्य समूह चरण भने अक्टोबर ७ मा केप टाउनमा भारत र अस्ट्रेलियाबीचको खेलबाट सुरु हुनेछ। पाकिस्तानले अक्टोबर ८ मा अफगानिस्तानसँग आफ्नो पहिलो समूह खेल खेल्नेछ। 

यसपटक प्रतियोगितामा १४ टोलीले १२ मैदानमा कुल ५७ खेल खेल्नेछन्। दक्षिण अफ्रिका, जिम्बाब्वे र नामिबियाले संयुक्त रूपमा प्रतियोगिता आयोजना गर्नेछन्। समूह चरणबाट प्रत्येक समूहका शीर्ष तीन टोली र दुई समूहका चौथो स्थानमध्ये उत्कृष्ट एक टोली ‘सुपर ७’ चरणमा पुग्नेछन्। 

सेमिफाइनल नोभेम्बर १७ र १८ मा हुनेछन् भने विश्वकपको फाइनल नोभेम्बर २१ मा जोहानेसबर्गमा खेलिनेछ। सन् २००३ पछि पहिलोपटक पुरुष एकदिवसीय विश्वकप अफ्रिकामा फर्किन लागेको हो। 

Photo: wonker / Wikimedia Commons / CC BY 2.0