सेयर बजारमा बिक्री दबाब, नेप्से ११.९० अंक घट्दा कारोबार पनि खुम्चियो

काठमाडौं : साताको अन्तिम कारोबार दिन शुक्रबार सेयर बजारमा गिरावट आएको छ। नेपाल स्टक एक्सचेन्ज (नेप्से) परिसूचक ११.९० अंक अर्थात् ०.४५ प्रतिशतले घटेर २,५८७.२५ विन्दुमा बन्द भएको छ।

शुक्रबार ३५६ धितोपत्रका १ करोड १९ लाख १२ हजार ५५० कित्ता सेयर ४३ हजार ६८५ पटक खरिद–बिक्री भएका छन्। कुल कारोबार रकम ४ अर्ब २९ करोड ३७ लाख रुपैयाँभन्दा बढी पुगेको छ। अघिल्लो कारोबार दिनको ४ अर्ब ८९ करोड रुपैयाँभन्दा बढीको तुलनामा कारोबार रकमसमेत घटेको हो।

कारोबार भएका कम्पनीमध्ये ६१ कम्पनीको मूल्य बढ्दा २०७ कम्पनीको घटेको र ११ कम्पनीको मूल्य स्थिर रहेको छ। अधिकांश उपसमूहमा गिरावट देखिँदा समग्र बजार दबाबमा परेको हो।

यस दिन एनएमबी डिबेन्चरको मूल्य सर्वाधिक १४.२९ प्रतिशतले बढेको छ। अर्कोतर्फ सिन्धु विकास बैंकको मूल्य ८.५५ प्रतिशतले घटेर सबैभन्दा धेरै गुमाउने धितोपत्र बनेको छ।

अघिल्लो कारोबार दिन नेप्से सामान्य ०.२६ अंकले बढेको थियो। शुक्रबारको गिरावटसँगै परिसूचक पुनः २,६०० विन्दुभन्दा तल झरेको छ।

प्रतीकात्मक तस्बिर: Wikimedia Commons / CC0