वित्तीय नियम उल्लंघनमा म्यानचेस्टर सिटी दोषी, सजायबारे छुट्टै सुनुवाइ हुने
लन्डन : इंग्लिस प्रिमियर लिग क्लब म्यानचेस्टर सिटीलाई लामो समयदेखि चलिरहेको वित्तीय नियम उल्लंघनसम्बन्धी मुद्दामा स्वतन्त्र आयोगले दोषी ठहर गरेको छ।
प्रिमियर लिगको निर्णयअनुसार सिटीलाई सन् २००९/१० देखि २०१७/१८ सम्म नौ सिजनमा गम्भीर वित्तीय नियम उल्लंघनसँग सम्बन्धित आरोपमा दोषी ठहर गरिएको हो। अनुसन्धानमा पूर्ण सहयोग नगरेको सम्बन्धमा लगाइएका चार आरोपमध्ये तीनवटा पनि प्रमाणित भएका छन्।
आयोगले विभिन्न व्यावसायिक साझेदारसँग भएका सम्झौताको वास्तविक प्रकृति लुकाएर क्लबको आम्दानी बढी र खर्च कम देखाइएको निष्कर्ष निकालेको छ। प्रिमियर लिगका अनुसार त्यस्ता व्यवस्थाले सम्बन्धित अवधिमा क्लबको आम्दानी र खर्चमा कुल ९० करोड पाउन्डभन्दा बढीको प्रभाव पारेको थियो।
म्यानचेस्टर सिटीले भने आयोगको निष्कर्ष अस्वीकार गर्दै अपिल गर्ने जनाएको छ। क्लबले निर्णयमा कानुनी, सैद्धान्तिक र तथ्यगत त्रुटि रहेको दाबी गर्दै आफूले गलत काम नगरेको अडान कायम राखेको छ।
सिटीमाथि कस्तो सजाय हुने भन्ने निर्णय भने अझै भएको छैन। सजाय निर्धारणका लागि छुट्टै सुनुवाइ हुनेछ। सम्भावित कारबाहीमा जरिवाना, अंक कटौतीदेखि गम्भीर अवस्थामा प्रिमियर लिगबाट निष्कासनसम्मका विकल्प हुन सक्ने भए पनि अन्तिम निर्णय आयोगले गर्नेछ।
अपिल र सजाय निर्धारण प्रक्रिया बाँकी रहेकाले यस प्रकरणको अन्तिम परिणाम आउन अझै समय लाग्ने देखिएको छ।
