भारतको केरलामा अचानक बाढी, मृतक संख्या ६ पुग्यो
नयाँदिल्ली — भारतको केरलामा नदीमा अचानक आएको बाढीका कारण मृत्यु हुनेको संख्या ६ पुगेको छ। घटनामा ज्यान गुमाउनेमध्ये पाँच जना एउटै जिल्लाबाट घुम्न गएका पर्यटक रहेको भारतीय सञ्चारमाध्यमले जनाएका छन्।
कोट्टापुझा नदी क्षेत्रमा आइतबार अचानक पानीको बहाव बढेपछि नदी आसपास रहेका मानिसहरू बाढीको चपेटामा परेका थिए। घटनापछि बेपत्ताको खोजी तथा उद्धारका लागि सुरक्षाकर्मी र स्थानीय उद्धार टोली परिचालन गरिएको थियो।
पछिल्लो खोजीका क्रममा थप शव फेला परेपछि मृतक संख्या ६ पुगेको हो। घटनाले विशेषगरी वर्षायाममा नदी तथा खोलानजिक घुम्न जाने मानिसको सुरक्षाबारे पुनः चिन्ता बढाएको छ।
यसैबीच भारतका विभिन्न क्षेत्रमा मौसम फेरि प्रतिकूल बन्ने पूर्वानुमान गरिएको छ। बंगालको खाडीमा विकसित मौसमी प्रणालीका कारण पश्चिम बंगालका केही क्षेत्रमा भारी वर्षा, चट्याङ र तेज हावाको सम्भावना रहेको भन्दै भारतीय मौसम विभागले ‘ओरेन्ज अलर्ट’ जारी गरेको छ।
सम्बन्धित निकायले खराब मौसमका बेला नदी, खोला तथा जोखिमयुक्त क्षेत्रमा नजान र स्थानीय प्रशासन तथा मौसम विभागबाट जारी हुने सूचनालाई पालना गर्न आग्रह गरेका छन्।
